Inzwüsche sind mir uf de Maledive. Leider nur uf de Hauptinsle und da mir nur en halbe Tag Ufenthalt händ, hets sichs ned glohnt, uf en Trauminsle z’gah. Shopping isch denn au guet gsi. Jetzt simmer zrugg uf em Schiff und ändlich fahred mir los Richtig Seychellen 🙂 Mir händ zwar 2 Seetäg vor Eus und hoffed uf ruhigi See. Vo Cochin uf Colombo hets ziemlich gschaukled. Eus isch es echli mulmig gsi im Mage, ohni dass mir zum Gück richtig Seekrank worde sind ;-). Z’Colombo hets Eus übrigens ned eso guet gfalle. Es isch sehr tüpig gsi, d’Stadt ned eso sehenswert und Euse Tourguide hed 18 Jahr in Italie gläbt und verm. Napoli besser kännt als Colombo ;-). Mir sind denn no usserhalb vo de Stadt uf en Bootsfahrt gange und händ viel Vögel beobachted. Leguane und Baby-Krokodil hämmer au z’gseh übercho. Die Fahrt zwüsched Mongrove und Palme isch sehr schön gsi. Usserdem hämmer riise Glück gha, dass es ned voll go Schiffe cho isch. De dunkli Himmel und die höchi Luftfüechtigkei händ nämmlich öpis anders lah vermuete. So, jetzt gis Lunch i Eusere herrliche Poolbar + es Gläsli Wiise 🙂 und denn es Pfüsi uf em Liegistuehl mit Bädele zum Abchüele (28.3 Grad!). Übrigens: im Sprudelbad simmer erst 2 x gsi. S’Wasser isch eigentlich herrlich heiss, wies muess sii, aber kombiniert mit de Lufttemperatur eifach too hot ;-). Liebi Grüess S&M